Thursday, May 27, 2010

مناجاة


يارب


وحدك تعلم كم احببته
ووحدك تعلم كم بكيت من اجله
ووحدك تعلم كم اتعذب الآن
ووحدك سوف تعوضني خير
يارب سبحانك ليس لي سواك
ان لم تكن غاضب علي فلا ابالي
غير ان عافيتك اوسع لي
اللهم اجرني في مصيبتي
وخلف لي خير منها

Wednesday, March 17, 2010


"سأنساك اليوم أيضا"

كلّ يوم

منذ أيام

لم يحدث أن نسيت

أن أنساك



أحلام مستغانمي

Sunday, July 26, 2009

لماذا ؟

لماذا لا نشعر بقيمة الأشياء إلا بعد أن نفقدها
سؤال طرأ على ذهني فجأة
نحن لا نشعر بقيمة الصحة إلا عندما نمرض
لا نشعر بقيمة الأصدقاء والأحباء إلا بعد أن نفقدهم أو نبتعد عنهم
عندها فقط نشعر كم كنا نحبهم
ونتمنى لو يعود العمر ساعة لنقضيها بالقرب منهم
أنا قررت إني أفكر نفسي بنعمة ربنا سبحانه وتعالى عليا
وأعطي لكل شيء في حياتي حقه قبل ما يضيع مني

************
الحمد لله على نعمة الإسلام قبل أي شيء
اللهم حبب لي طاعتك واغفر لي وارحمني
الحمد لله على نعمة العقل
الحمد لله على نعمة الصحة هي صحيح على قدها بس الحمد لله
أنا أحسن كتير من غيري
الحمد لله على نعمة الأصدقاء من أكبر نعم ربنا عليا انه رزقني بأصحاب بحبهم وبيحبوني
كفاية اني لما ببقى متضايقه ومحتاجة ابكي عندي أكتر 10 ارقام تليفون مستعدين لإستقبال كل انفعالاتي
وبكائي وفرحي في كل وقت
الحمد لله وهبني ابوين صالحين وطيبين وبيحبوني
وأخوات ربنا يخليهم ليا
وأولاد اخ اشقيا بس بحبهم ربنا يخليهم
ويسامحهم علشان كسروا لي سماعة ال
mp3 امبارح
****
والحمد لله برضه ان في ناس بيكرهوني على الأقل باخد منهم حسنات
ربنا يهدهم
والحمد لله إني بحب القراءة واستفدت كتير واستمتعت بالكتب اللي قريتها
والحمد لله على نعمة الرزق الحلال
رغم كمية القرف والكبت والضغط النفسي
بس هي دي الدنيا
****
الحمد لله مشكلتي احيانا وناس كتير انهم بيفكروا في اللي ناقصهم
ومش بيفكروا في اللي عندهم
انا فكرت اكتب اللي عندي علشان أخرج نفسي من دوامة الإكتئاب بلاش افكر في اللي مش عندي
لأنه جايز ما يكونش فيه السعادة
خلينا نستمتع بحياتنا وبالموجود فيها قبل ما يضيع ونلاقي نفسنا في الأخر ضيعنا العمر في البكاء
على حلم بعيد أو أمنية مستحيلة
أو ................

ش ي م ا ء

Thursday, May 21, 2009

القصيدة الأخيرة


ولمن يكون الشعر بعدك ملهمي
والقول بات إذا نطقت مقيدا
والقلب طفل
شاب يوم تركته
وازداد شيبا
أن بغيرك قيدا
أخشى الملام إذا شردت بخاطري
ونسجت من همس الخيال
قصائدا
وأفر من طيف الحنين إذا رنا
نحو الفؤاد
ونال منه تنهدا
كم حن صوتي أن يعانق مهجتي
فأخاف إن افصحت
يقتلني الصدى
ذكراك بركان
بقلبي كامن
يهفو لجمر القول
كي يتجددا
ما عدت أملك في غرامك حيلة
إن ذاب نبض القلب
صارت منجدا
يوما نذرت لمقلتيك خواطري
وظننت طيف رؤاك فجرا
قد بدا
وهواك محراب الفؤاد وقبلتي
وربيع زهر
عاش يشتاق الندى
فجنيت من حسن الظنون صبابة
تأبى لذاك العشق
أن يتبددا
قد كنت حلما
طاف دربي عاشقا
واليوم ضاع العشق يا حلمي سدى
قلبي وقلبك
في الغرام تفرقا
وأطل من أضحى لطيفك مبعدا
قد صار بين العمر قلب ثالث
يضنيه في ذكراك
أن أتعبدا
فألوم نفسي
إن ذكرتك لحظة
أولى بشعري أن لغيرك ينشدا
أولى بزهري
من رواه ومن دنا
ودعاه بين هواه
أن يتزودا
ما كان قلبي جارحا أو ناكرا
ليذل من يرعاه
أو يتمردا
يدمى فؤادي
أن يراك مليكه
وسواك أولى أن له يتوددا
قيدت قولي
واصطنعت مشاعري
وهجرت ما نطق الفؤاد
وما شدا
ورسمت فوق شرود وجهي
بسمة
ودعوت ربي أن بذلك أسعدا
ولأن قلبي في غرامك خالد
سيظل هجري للقصيد
مخلدا

على جنب :- القصيدة لهبة عصام الدين كانت زميلتي في الدراسات العليا وهي من الشاعرات القلائل اللي حبيتهم
لو حبيت أخدع نفسي هقول اني بحب القصيدة علشان عارفة طرفيها
لكن الحقيقة بحبها لأنها بتعبر عن إحساسي حاليا


Friday, May 1, 2009

في الحلم دايما بفتكر لمسة ايديك

انا كنت كاتبه العنوان ده من فترة ومش فاكرة كتبت ايه تحته
لأني تراجعت ومسحته
اللي خلاني اكتب النهاردة اني حاسة اني اتجننت
انا ما انكرش اني ساعات ببقى مجنونة بس النهاردة زادت
انا النهاردة ضيفت نفسي من الياهو على الهوت ميل وفضلت اتكلم معايا
طيب ايه الجديد ؟
ما انا طول عمري بتكلم مع نفسي
مش عارفة
انا عاوزة ابطل الكلمة دي لما براجع يومياتي دايما تبدأ
مش عارفة وتنتهي محتارة
لالا القاموس عاوز يتعدل
تفتكري، جايز ، حزينة ، ممكن ، إحتمال ، قد يكون
ايه نظرية الإحتمالات اللي انا عايشة فيها دي
بس ما هي منطقية كل حاجة في الدنيا بتخضع لمجموعة احتمالات إما.... أو
جميل الإستطراد ده طيب المشكلة الأساسية
ايه الحكمة اني اكلم نفسي على النت
طيب وايه المشكلة ما انا بكلم نفسي على الورق وفي المراية
وحتى في الشارع دايما المونولوج الداخلي بيني وبين نفسي مستمر
يمكن ده التطور الطبيعي
طيب ايه علاقة الرغي الكتير ده بالعنوان
مافيش لسبب بسيط
العنوان اتكتب في مرة وكان في كلام تحته غالبا خطاب باكي او قصيدة عصماء في الحبيب المجهول
ومسحته
وكتبت اكتشاف الشات الذاتي في مرة والنهاردة بدأت من جزئية القاموس
يعني كلام مش مترابط بس بيعبر عن اللخبطة اللي جوايا
حاسة اني جوة قطر ماشي من غير ما يوقف في محطات
وفي الأخر ها يخبط في الحيط
ونفسي النهاية دي تقرب
غريبة التدوينة دي !! في بالي 3 موضوعات ما كتبتش فيهم
وكتبت في حاجة تانية خالص

Wednesday, March 25, 2009

طيب

دراسة إلغاء خانة الديانة من بطاقات الهوية الشخصية للمصريين

ده كان عنوان خبر في الجرايد المصرية النهاردة ولفت نظري فيه جملة مهمة على لسان علي الدين هلال أمين لجنة الإعلام بالحزب الوطني

قال ايييه " "أنه قد تكون هناك بعض الآراء المتعصبة والرافضة لمثل هذا التوجه الجديد في الحزب الوطني، لكننا سنستمر على هذا النهج لتفعيل مبدأ المواطنة وإرساء ثقافة المساواة بين جميع شرائح المجتمع المصري "


طيب ايه علاقة المساواة بإلغاء خانة الديانة

لو افترضنا إن المجتمع فيه تعصب او فتنة إلغاء خانة الديانة في البطاقة هيقضي على الفتنة

الدين بلإضافة إلى انه علاقة بين الإنسان وربه هو جزء أصيل من هوية كل واحد

انا مصرية ومسلمة وانثى وأرفض إن حد يشيل جزء من هويتي تحت أي مسمى

افتكر الخطوة الجاية إلغاء خانة النوع من البطاقة

اولا :- احنا في مجتمع ذكوري يجهض حقوق المرأة في الحياة
ثانيا :- اكيد بعد ما البهائيين خدوا حقهم جه الدور على الشواذ
لزمته ايه بقى الإحراج ويكتبوا النوع icon_lol.gif icon_lol.gif

طيب هو لازمته ايه تاريخ الميلاد حتى ده محرج للستات وكل الموظفين ما عندهمش دم
اول ما تدي للواحد بطاقتك يقعد يبص على تاريخ الميلاد

كده فاضل المؤهل وده ما لوش لزمة ما خريج الحقوق بيشتغل سواق تاكسي
يعني كلها حبر على ورق

طيب والجنسية ؟؟؟؟؟؟ لأ المصري بيبان عليه
انا ايام الدراسات العليا في معهد الدراسات العربية كل اللي كان بيكلمني كان بيعرف بالفراسة اني مصرية .
او لو حد سألك انت مصري ؟ ممكن تقوله يعني شايفني راكن الفيل على الناصية ؟
ده بغض النظر إن الهند صنعت قنبلة ذرية وإحنا بنستورد الأقلام الجاف

فاضل الإسم وده انا شخصيا مش هتنازل عنه كل واحد يكتب ورقة عليها اسمه ويعلقها
بدل الميدالية في الموبايل

وبكده يبقى مصر قفزت قفزة هائلة نحو المساواة وحقوق الإنسان